Иккис Введенскэй ааҕыылар

«Бэҕэһээҥи күн баар буолан, бүгүҥҥү күн үөскээбитэ чахчы. Бүгүҥҥү күн баар буолан сарсыҥҥы күн үүнүөҕэ. Бу иһин ити үс кэми: ааспыты, билиҥҥини, кэлэри – хайа да киһи араарбакка биир ситимнээн өйдүөхтээх» - диэн саха норуотун улуу суруйааччыта Дмитрий Кононович Сивцев – Суорун Омоллоон эппиттээх.

Кулун тутар 29 күнүгэр Сунтаардааҕы Воскреснай оскуола дьиэтигэр иккис Введенскэй ааҕыылар буоллулар.  Бу ааҕыылар историяҕа интэриэһи күүһүрдэр, онтон сиэттэрэн духуобунай традицияларга олоҕуран киһини иитэн таһаарарга көмөлөһөр сыаллаах иккис төгүлүн ыытылыннылар. Барыта 18 дакылаатынан  улуус 7 үөрэҕин тэрилтэтиттэн  20 үөрэнээччи уонна учуутал кытынна. Дьүүллүүр субэҕэ Дьокуускайтан Никон иеромонах, Бүлүүттэн  Гермоген иеромонах, Ньурбаттан Анатолий аҕабыт, Сунтаартан Александр аҕабыт, Антонова А.В. (Сунтаардааҕы оҕо дьоҕурун сайыннарар киин директора), Григорьева А.В. (ЗАГС отделын салайааччыта), Герасимова Н.П. («Татыйыына» фирма директора) үлэлээтилэр.

Быйылгы ааҕыылар уратыларынан элбэх үөрэнээччи кыттыбыта буолла. Ааҕыылар түмүктэринэн оҕолорго бастакы миэстэни архыып матырыйаалларын, «Утум» музей экспонаттарын үгүстүк туһанан, Сиэйэ орто оскуолатын 9 кылааһын үөрэнээччитэ Постникова Дайаана(сал.Максимова О.П., Постникова И.Г.), «Григорий Мисаилович Попов - Сиэйэ Георгиевскай Таҥаратын  дьиэтин аҕабыта» диэн үлэтинэн ылла.  Дайаана бэйэтин дакылаатыгар Г.М.Попову дьон  өйүгэр-санаатыгар аҕабыт эрэ курдук буолбакка бастакы кыраайы үөрэтээччилэртэн биирдэстэрин быһыытынан хаалбыт диэн бэлиэтээтэ.

Иккис  миэстэни эмиэ элбэх литератураны, интернет-источниктары, үөрэх музейын матырыйаалларын туһаммыт Сунтаар гимназиятын 9 кылааһын үөрэнээччитэ Иванова Наташа(сал.Иванова А.Г.) «Дууһаҕа үтүө илгэни уган…Учуутал П. В. Громов олоҕун туһунан» дакылаата ылла. Итинтэн хаалсыбакка иккис миэстэни тэҥҥэ үллэһиннэ Элгээйи оскуолатын  9 кылааһын үөрэнээччитэ Семенова  Диана (сал.Николаева С.В.) «Киһи орто дойдуга олох олороору, оҕо төрөтөөрү кэлэр…»диэн үлэтинэн. Диана  саамай чаҕылхай, сытыы кыттааччынан сыаналанна.

3 миэстэни үллэһиннилэр ааҕыылар саамай кыра саастаах кыттааччылара  Элгээйи оскуолатын  1 кылааһын үөрэнээччитэ Охлопков Алеша(сал.Павлова Л.К.) уонна Сунтаар начальнай оскуолатын 3  кылааһын үөрэнээччитэ Иванова Акулина (сал.Иванова А.Г.) Биһирэбил бириискэ уонна харчынан бириэмийэҕэ, мустубут дьон сөҕүүтүн-махтайыытын ылан,урукку Введенскэй танара дьиэтин макетын оҥорбут Сунтаар №1 оскуолатын үөрэнээччилэрин бөлөҕө(сал.Антонов Г.Г.) тигистэ.

Киһи аймах культуратын, историятын  үгүс өттө итэҕэли кытта сибээстээх. Маны оскуолаҕа история, литература, тыл, искусство уруоктарыгар  үөрэтэллэр. Ол да иһин ааҕыылар кыттыылаахтарынан уонна үөрэнээччилэр үлэлэрин салайааччыларынан гуманитарнай предметтэр учууталлара буолаллар. 

Илимниир оскуолатын учуутала  Егорова В.Н. «Ылдьаа аҕабыт туһунан» үлэтэ улахан сэҥээриини ылан бастаата. Иккис төгүлүн ааҕыыларга кыттар Сунтаар №1 оскуолатын учуутала Иванова Е.Э. «Нэһилиэк духуобунай сайдыытыгар педагогическай династиялар  оруоллара» диэн үлэтигэр  республика биир кырдьаҕас учуутала Попов А.Н. саҕалаан Поповтар педагогическай династияларын историятын итэҕэтиилээхтик арыйан  иккис миэстэни ылла. Тойбохой оскуолатын учуутала Григорьева Е.А. оскуола улахан бырайыагар киирсэн история учууталын быһыытынан патриотическай иитиигэ ыытар үлэтэ 3 миэстэҕэ тигистэ.

Никон иеромонах бэлиэтээбитинэн бу ааҕыыларга Бүлүү бөлөх улуустарыттан кэлэн кыттыбыттара буоллар өссө ордук буолуо этэ.

Альбина Иванова, бырайыак координатора